ജോലിക്ക് കയറി ആദ്യദിവസം തന്നെ കമ്പനിയില് നിന്ന് പിരിച്ചുവിടപ്പെട്ട ജീവനക്കാരിക്ക് കമ്പനി ഒരു ലക്ഷം ദിര്ഹം (22,85,500 രൂപ) നഷ്ടപരിഹാരം നല്കണമെന്ന് അബുദാബി കോടതി. അബുദാബി കുടുംബ-സിവില് അഡ്മിനിസ്ട്രേറ്റീവ് കോടതിയാണ് ജീവനക്കാരിക്ക് അനുകൂലമായി വിധി പുറപ്പെടുവിച്ചത്.
കമ്പനിയില് നിന്നുണ്ടായ അപ്രതീക്ഷിത തീരുമാനത്തിനെതിരെ അഞ്ച് ലക്ഷം ദിര്ഹം (1,14,27,500 രൂപ) നഷ്ട പരിഹാരം ആവശ്യപ്പെട്ടു കൊണ്ടായിരുന്നു യുവതി കോടതിയെ സമീപിച്ചത്. പരാതി വിലയിരുത്തിയ കോടതി യുവതിക്ക് ഒരു ലക്ഷം ദിര്ഹം നഷ്ടപരിഹാരം അനുവദിക്കുകയായിരുന്നു. പുതിയ കമ്പനിയില് 31000 ദിര്ഹം (7,08,505 രൂപ) ശമ്പളമാണ് ജീവനക്കാരിയ്ക്ക് വാഗ്ദാനം ചെയ്തിരുന്നത്. കമ്പനിയുടെ നിര്ദേശമനുസരിച്ച് ഇവര് മുമ്പ് ജോലി ചെയ്തിരുന്ന കമ്പനിയില് നിന്ന് രാജിവെയ്ക്കുകയും ചെയ്തു.
എന്നാല് ജോലിയ്ക്കെത്തിയ ആദ്യദിവസം തന്നെ യുവതിയെ പിരിച്ചുവിട്ടതായി കമ്പനി അറിയിച്ചു. ഇതോടെ മാനസിക സമ്മര്ദ്ദത്തിലായ യുവതി നേരെ കോടതിയെ സമീപിക്കുകയായിരുന്നു. മുമ്പ് ചെയ്തിരുന്ന ജോലി ഉപേക്ഷിച്ചെത്തിയ ജീവനക്കാരിയെ മതിയായ കാരണങ്ങള് ഇല്ലാതെയാണ് പിരിച്ചുവിട്ടതെന്നും കമ്പനിയുടെ ഭാഗത്ത് പിഴവുണ്ടായതായും കോടതി കണ്ടെത്തി.
