2025 ഓഗസ്റ്റ് 27 മുതൽ, ഇന്ത്യയിൽ നിന്ന് ഇറക്കുമതി ചെയ്യുന്ന സാധനങ്ങൾക്ക് യുഎസ് 50% തീരുവ ചുമത്തി. അതിൽ 25% അടിസ്ഥാന താരിഫും 25% അധിക താരിഫും ഉൾപ്പെടുന്നു. ഇന്ത്യ റഷ്യയിൽ നിന്ന് എണ്ണയും സൈനിക ഉപകരണങ്ങളും വാങ്ങുന്നതിനുള്ള പ്രതികരണമായാണ് ഈ നീക്കം. എന്നിരുന്നാലും, ഫാർമസ്യൂട്ടിക്കൽസ്, സ്മാർട്ട് ഫോണുകൾ, പെട്രോകെമിക്കൽസ് തുടങ്ങിയ ചില മേഖലകളെ യുഎസ് അവരുടെ താൽപ്പര്യങ്ങൾ മനസിൽ വെച്ചുകൊണ്ട് ഈ താരിഫിൽ നിന്ന് ഒഴിവാക്കിയിട്ടുണ്ട്.
അതിനാൽ ഈ മേഖലകൾക്ക് അധിക തീരുവ നേരിടേണ്ടിവരില്ല. ഈ ലേഖനത്തിൽ, ഈ താരിഫ് ബാധിക്കുന്ന മേഖലകളെയും ബാധിക്കാത്ത മേഖലകളെയും വിശകലനം ചെയ്യും. കൂടാതെ ഇന്ത്യയുടെ കയറ്റുമതി തന്ത്രത്തിൽ അതിൻ്റെ സ്വാധീനം മനസിലാക്കുകയും ചെയ്യും.
താരിഫ് ബാധിക്കാത്ത മേഖലകൾ
- ജനറിക് മരുന്നുകൾ:
യുഎസ് ആശ്രിതത്വം: യുഎസ് വിപണിയിൽ ഇന്ത്യൻ ജനറിക് മരുന്നുകൾക്കുള്ള ആവശ്യം വളരെ കൂടുതലാണ്. യുഎസിലെ 90% പ്രിസ്ക്രിപ്ഷനുകളും ജനറിക് മരുന്നുകൾക്കാണ്. അതിൽ 40% ഇന്ത്യയിൽ നിന്നാണ് ഇറക്കുമതി ചെയ്യുന്നത്. 2024ൽ ഇന്ത്യ 9.5 ബില്യൺ ഡോളറിൻ്റെ മരുന്നുകൾ യുഎസിലേക്ക് കയറ്റുമതി ചെയ്തു. ഇവയുടെ താരിഫ് പൂജ്യമായി തുടരും.
തദ്ദേശീയ ഉൽപ്പാദനത്തിലൂടെ യുഎസിന് ജനറിക് മരുന്നുകളുടെ ആവശ്യം നിറവേറ്റാൻ കഴിയാത്തതിനാലാണ് ഈ ഇളവ് നൽകിയിരിക്കുന്നത്. ഇന്ത്യൻ ഫാർമസ്യൂട്ടിക്കൽ വ്യവസായത്തിന് ഇത് ഒരു വലിയ അവസരമാണ്. കാരണം ഇത് ലാഭം നിലനിർത്തുക മാത്രമല്ല, ആഗോള വിതരണ ശൃംഖലയിൽ ഇന്ത്യയുടെ സ്ഥാനം ശക്തിപ്പെടുത്തുകയും ചെയ്യുന്നു.
- സ്മാർട്ട് ഫോണുകൾ:
ഇന്ത്യയുടെ വളരുന്ന ശക്തി: സ്മാർട്ട് ഫോൺ കയറ്റുമതിയിൽ ഇന്ത്യ ഗണ്യമായ പുരോഗതി കൈവരിച്ചു. 2024- 25 ൽ ഇന്ത്യ 10.6 ബില്യൺ ഡോളർ മൂല്യമുള്ള സ്മാർട്ട് ഫോണുകൾ യുഎസിലേക്ക് കയറ്റുമതി ചെയ്തു. ഈ മേഖലയും താരിഫ് രഹിതമായി തുടരും.
2025 ജൂലൈയിലെ ഒരു റിപ്പോർട്ട് അനുസരിച്ച് യുഎസ് സ്മാർട്ട് ഫോൺ വിപണിയിലെ ഏറ്റവും മികച്ച വിതരണക്കാരായി ഇന്ത്യ ചൈനയെ മറികടന്നു. അതിൻ്റെ വിഹിതം 13% ൽ നിന്ന് 44% ആയി വർദ്ധിച്ചു. ഇന്ത്യയുടെ ‘മെയ്ക്ക് ഇൻ ഇന്ത്യ’, പിഎൽഐ (പ്രൊഡക്ഷൻ ലിങ്ക്ഡ് ഇൻസെന്റീവ്) പദ്ധതിയുടെ ഫലമായാണ് ഈ നേട്ടം. ഇത് ആപ്പിൾ, സാംസങ് തുടങ്ങിയ കമ്പനികളെ ഇന്ത്യയിൽ ഉൽപ്പാദനം വർദ്ധിപ്പിക്കാൻ പ്രോത്സാഹിപ്പിച്ചു.
- പെട്രോകെമിക്കൽസ്:
സ്ഥിരതയുള്ള താരിഫ്: കയറ്റുമതിയിൽ 4.1 ബില്യൺ ഡോളർ സംഭാവന നൽകുന്ന പെട്രോകെമിക്കലുകളുടെ താരിഫ് 6.9% ൽ സ്ഥിരമായി തുടരും. ഈ മേഖല യുഎസിന് പ്രധാനമാണ്. താരിഫ് ഇളവുകൾ ഇന്ത്യയുടെ മത്സരശേഷി നിലനിർത്തും. എന്നിരുന്നാലും, ഇന്ത്യ റേറ്റിംഗുകളും ഗവേഷണവും അനുസരിച്ച്, ചില കെമിക്കൽ ഉൽപ്പന്നങ്ങൾ താരിഫ് ബാധകമാകാൻ സാധ്യതയുള്ളതിനാൽ, കെമിക്കൽ കയറ്റുമതി (പെട്രോകെമിക്കലുകൾ ഉൾപ്പെടെ) 2026 സാമ്പത്തിക വർഷത്തിൽ 2-7 ബില്യൺ ഡോളർ കുറയാൻ സാധ്യതയുണ്ട്.
താരിഫ് ബാധിച്ച മേഖലകൾ
ഗ്ലോബൽ ട്രേഡ് റിസർച്ച് ഇനിഷ്യേറ്റീവ് (GTRI) റിപ്പോർട്ട് അനുസരിച്ച്, ഇന്ത്യയുടെ മൊത്തം കയറ്റുമതിയായ 86.5 ബില്യൺ ഡോളറിൻ്റെ 60.2 ബില്യൺ ഡോളർ (ഏകദേശം 66%) 50% താരിഫ് മൂലം ബാധിക്കപ്പെടും. ഇത് പല തൊഴിൽ മേഖലകളിലും കുത്തനെ ഇടിവിന് കാരണമാകുമെന്ന് പ്രതീക്ഷിക്കുന്നു. ഇത് ദശലക്ഷക്കണക്കിന് തൊഴിലുകളെ ബാധിച്ചേക്കാം.
- വസ്ത്രങ്ങളും വീട്ടുപകരണങ്ങളും:
വസ്ത്രങ്ങൾ: 3.4 ബില്യൺ ഡോളർ മൂല്യമുള്ള കയറ്റുമതിയുടെ താരിഫ് 12%ൽ നിന്ന് 62% ആയി വർദ്ധിച്ചു. യുഎസിൽ 29% വിപണി വിഹിതമുള്ള ഇന്ത്യയുടെ തുണി വ്യവസായത്തിന് ഇത് വലിയ തിരിച്ചടിയാണ്. ബംഗ്ലാദേശ്, വിയറ്റ്നാം തുടങ്ങിയ രാജ്യങ്ങളിൽ നിന്നുള്ള മത്സരം വർദ്ധിക്കാൻ സാധ്യതയുണ്ട്.
ഗാർഹിക തുണിത്തരങ്ങൾ: 3.0 ബില്യൺ ഡോളർ മൂല്യമുള്ള കയറ്റുമതിയുടെ താരിഫ് 9% ൽ നിന്ന് 59% ആയി ഉയർന്നു. ഇത് പരവതാനികൾ, ഫർണിച്ചറുകൾ തുടങ്ങിയ ഉൽപ്പന്നങ്ങളുടെ ആവശ്യകതയെ ബാധിക്കും.
- ചെമ്മീൻ:
രണ്ട് ബില്യൺ ഡോളർ വിലമതിക്കുന്ന ചെമ്മീൻ കയറ്റുമതിയുടെ താരിഫ് പൂജ്യത്തിൽ നിന്ന് 60% ആയി ഉയർന്നു. ഇന്ത്യയുടെ ചെമ്മീൻ കയറ്റുമതി യുഎസിനും ചൈനക്കും പ്രധാനമാണ്. എന്നാൽ ഈ താരിഫ് ആന്ധ്രാപ്രദേശ് പോലുള്ള സംസ്ഥാനങ്ങളിലെ ലക്ഷക്കണക്കിന് കർഷകരെ ബാധിക്കും. ഓർഡറുകൾ നിലച്ചതിനാൽ വിലക്കുറവ് ഇതിനകം ആരംഭിച്ചു.
- ആഭരണങ്ങളും വജ്രങ്ങളും:
ആഭരണങ്ങൾ: 3.6 ബില്യൺ ഡോളർ മൂല്യമുള്ള കയറ്റുമതിയുടെ താരിഫ് 5.8%ൽ നിന്ന് 55.8% ആയി ഉയർന്നു. ഇത് സൂററ്റ്, മുംബൈ പോലുള്ള കേന്ദ്രങ്ങളിലെ കരകൗശല വിദഗ്ദരുടെ ജോലികൾ അപകടത്തിലാക്കുന്നു.
വജ്രങ്ങൾ: 4.9 ബില്യൺ ഡോളർ മൂല്യമുള്ള കയറ്റുമതിയുടെ താരിഫ് പൂജ്യത്തിൽ നിന്ന് 50% ആയി ഉയർന്നു. യുഎസിൽ ലാബ്- ഗ്രൂപ്പ് വജ്രങ്ങൾക്കുള്ള വർദ്ധിച്ചുവരുന്ന ആവശ്യം ഇതിനകം തന്നെ ഈ വ്യവസായത്തെ ബാധിക്കുന്നുണ്ട്. താരിഫ് വർധനവ് അതിനെ കൂടുതൽ ദുർബലപ്പെടുത്തും.
- യന്ത്രസാമഗ്രികളും ഓട്ടോ ഭാഗങ്ങളും:
യന്ത്രഭാഗങ്ങൾ: 6.7 ബില്യൺ ഡോളറിൻ്റെ കയറ്റുമതിയുടെ താരിഫ് 1.3%ൽ നിന്ന് 51.3% ആയി വർദ്ധിച്ചു. മേഖലയുടെ 40% വരുന്ന ചെറുകിട, ഇടത്തരം സംരംഭങ്ങളെ ആയിരിക്കും ഏറ്റവും കൂടുതൽ ബാധിക്കുക.
ഓട്ടോ പാർട്സ്: 6.4 ബില്യൺ ഡോളർ മൂല്യമുള്ള കയറ്റുമതിയുടെ താരിഫ് 1%ൽ നിന്ന് 26-51% ആയി വർദ്ധിച്ചു. ഇത് കാർ ഉൽപ്പാദനത്തിൻ്റെയും അറ്റകുറ്റ പണിയുടെയും ചെലവ് വർദ്ധിപ്പിക്കും. ഇത് ഇന്ത്യയുടെ വിഹിതം കുറച്ചേക്കാം.
ഇന്ത്യയുടെ വെല്ലുവിളികളും അവസരങ്ങളും
ഈ താരിഫ് ഇന്ത്യയുടെ കയറ്റുമതിയിൽ 43% വരെ കുറവുണ്ടാക്കും. ഇത് 2026 ആകുമ്പോഴേക്കും കയറ്റുമതി 86.5 ബില്യൺ ഡോളറിൽ നിന്ന് 49.6 ബില്യൺ ഡോളറായി കുറക്കും. ഇത് ഇന്ത്യയുടെ ജിഡിപി വളർച്ചാ നിരക്ക് 6.5%ൽ നിന്ന് 5.6% ആയി കുറയ്ക്കും.
എന്നിരുന്നാലും, ഈ പ്രതിസന്ധിയെ നേരിടാൻ ഇന്ത്യൻ സർക്കാർ തന്ത്രങ്ങൾ മെനയാൻ തുടങ്ങിയിട്ടുണ്ട്. 30 പുതിയ രാജ്യങ്ങളെ ഫോക്കസ് മാർക്കറ്റാക്കി കയറ്റുമതി വർദ്ധിപ്പിക്കാൻ വാണിജ്യ മന്ത്രാലയം പദ്ധതിയിട്ടിട്ടുണ്ട്. ഇത് യുഎസ് വിപണിയെ ആശ്രയിക്കുന്നത് കുറക്കും. യൂറോപ്പിലേക്കും (ജർമ്മനി, യുകെ) ആസിയാൻ രാജ്യങ്ങളിലേക്കും (സിംഗപ്പൂർ, മലേഷ്യ) എഞ്ചിനീയറിംഗ്, ടെക്സ്റ്റൈൽ കയറ്റുമതി വർദ്ധിപ്പിക്കാനുള്ള സാധ്യതയുണ്ട്.
