പ്രധാനമന്ത്രി നരേന്ദ്ര മോദി പങ്കെടുത്ത കേരളാ സന്ദർശന പരിപാടിയിൽ സംസാരിച്ചതിനെ തുടർന്ന് സോഷ്യൽ മീഡിയ ഒട്ടാകെ വലിയ രീതിയിൽ വിമർശനങ്ങൾ കേൾക്കേണ്ടി വന്ന നടി ശോഭന ഇപ്പോൾ തന്റെ രാഷ്ട്രീയ നയം വ്യക്തമാക്കിയിരിക്കുകയാണ്. പ്രസ്തുത പരിപാടിയിൽ ഒരു നടി എന്ന നിലയിൽ അതിഥി ആയാണ് പങ്കെടുത്തത് എന്ന പലരുടെയും വാദത്തെ തള്ളി കളയുന്ന രീതിയിൽ ആണ് നിലവിൽ നടി ശോഭന തിരുവനന്തപുരം ബി ജെ പി സ്ഥാനാർഥി രാജീവ് ചന്ദ്രശേഖറിന് വേണ്ടി വോട്ട് അഭ്യർത്ഥിച്ചുകൊണ്ട് രംഗത്ത് വന്നിരിക്കുന്നത്.
ബിജെപി രാഷ്ട്രീയത്തിനൊപ്പം എന്ന വലിയ അഭ്യൂഹങ്ങൾക്കിടെയാണ് ശോഭന തിരുവനന്തപുരത്തെത്തിയതും രാജീവ് ചന്ദ്രശേഖറിന് വിജയാശംസ നേര്ന്നതും. നാളെ തിരുവനന്തപുരം വെച്ച് നടക്കുന്ന എൻ ഡി എ തിരഞ്ഞെടുപ്പ് പൊതുയോഗത്തിൽ പങ്കെടുക്കാൻ ആണ് നടി ശോഭന തിരുവനന്തപുരം എത്തിയത്. പ്രസ്തുത പരിപാടി പ്രധാനമന്ത്രി നരേന്ദ്ര മോദി പ്രധാന അതിഥിയായി എത്തും.
ഇത്തവണ സജീവ രാഷ്ട്രീയത്തിലേക്കുള്ള സാധ്യത തള്ളാതെയായിരുന്നു ശോഭനയുടെ പ്രതികരണം. നിലവിൽ സിനിമയും കലയും ആണ് മനസ്സിൽ എന്നും ഭാവിയിലെ കാര്യങ്ങൾ ഇപ്പോൾ പറയാൻ ആകില്ല എന്നുമായിരുന്നു ശോഭനയുടെ പ്രതികരണം.
നെയ്യാറ്റിൻകര ടിബി ജംങ്ഷനിൽ നിന്നു തുടങ്ങിയ റോഡ് ഷോയിലും ശോഭന തിളങ്ങി നിന്നു. അവസാന റൗണ്ട് പ്രചാരണത്തിലേക്ക് എത്തുമ്പോൾ കളി മാറ്റി കളം പിടിക്കാൻ ഉള്ള ശ്രമത്തിൽ ആണ് എൻ ഡി എ. വലിയ താരനിരകളും പ്രമുഖരുമാണ് ബി ജെ പി സ്ഥാനാർഥികൾക്ക് വേണ്ടി വോട്ട് ചോദിച്ച് രംഗത്ത് വരുന്നത്.