ഇറാൻ പരമോന്നത നേതാവ് ആയത്തുള്ള അലി ഖമനേയി കൊല്ലപ്പെട്ടത് ചരിത്രപരമായ നീതിയാണെന്ന് യുഎസ് പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചു. ഇസ്രായേലുമായി ചേർന്ന് അമേരിക്ക നടത്തിയ അതിനൂതനമായ സൈനിക നീക്കത്തിലൂടെയാണ് ഖമനേയി കൊല്ലപ്പെട്ടത്. ചരിത്രത്തിലെ ഏറ്റവും ക്രൂരന്മാരായ ഭരണാധികാരികളിൽ ഒരാളായ ഖമനേയിയുടെ അന്ത്യം ഇറാനിലെ ജനങ്ങൾക്ക് മാത്രമല്ല, ഖമനേയിയും അദ്ദേഹത്തിന്റെ സംഘവും ചേർന്ന് കൊലപ്പെടുത്തിയ അമേരിക്കക്കാർക്കും ലോകമെമ്പാടുമുള്ള മറ്റുള്ളവർക്കും ലഭിച്ച നീതിയാണെന്നും ട്രംപ് വ്യക്തമാക്കി.
അമേരിക്കയുടെ രഹസ്യാന്വേഷണ വിഭാഗവും അത്യാധുനിക ട്രാക്കിംഗ് സംവിധാനങ്ങളും ഖമനേയിയെ പിന്തുടർന്ന് വകവരുത്തുകയായിരുന്നുവെന്ന് പ്രസിഡന്റ് പറഞ്ഞു. ഈ നീക്കത്തിൽ നിന്ന് രക്ഷപ്പെടാൻ ഖമനേയിക്കോ അദ്ദേഹത്തോടൊപ്പമുണ്ടായിരുന്ന മറ്റ് നേതാക്കൾക്കോ സാധിച്ചില്ല. ഖമനേയിയുടെ ഉപദേശകനും പ്രതിരോധമന്ത്രിയും ഉൾപ്പെടെയുള്ള ഏഴ് പ്രധാന ബുദ്ധികേന്ദ്രങ്ങളെ ഇസ്രായേൽ സേന തുടച്ചുനീക്കിയതായാണ് റിപ്പോർട്ടുകൾ. ഖമനേയി കൊല്ലപ്പെട്ടതോടെ ഇറാൻ എന്ന രാജ്യം തന്നെ തകർക്കപ്പെട്ടതായും രാജ്യം വീണ്ടെടുക്കാൻ ഇറാനിയൻ ജനതയ്ക്ക് ലഭിച്ച വലിയ അവസരമാണിതെന്നും അദ്ദേഹം കൂട്ടിച്ചേർത്തു.
ഇറാനിലെ സുരക്ഷാ സേനകളായ ഇസ്ലാമിക് റെവല്യൂഷണറി ഗാർഡ് (IRGC), പോലീസ് എന്നിവരോട് ആയുധം താഴെ വെച്ച് കീഴടങ്ങാൻ ട്രംപ് ആഹ്വാനം ചെയ്തു. ഇപ്പോൾ കീഴടങ്ങുന്നവർക്ക് പൂർണ്ണ പരിരക്ഷ (Immunity) നൽകുമെന്നും എന്നാൽ വൈകിയാൽ മരണം മാത്രമായിരിക്കും ഫലമെന്നും അദ്ദേഹം മുന്നറിയിപ്പ് നൽകി. ഇറാൻ ജനത വീടുകൾക്കുള്ളിൽ തന്നെ കഴിയണമെന്നും ഐ.ആർ.ജി.സി അംഗങ്ങൾ സമാധാനപരമായി ജനങ്ങളുമായി ചേർന്ന് രാജ്യത്തെ പഴയ മഹത്വത്തിലേക്ക് തിരികെ കൊണ്ടുവരണമെന്നും അദ്ദേഹം പ്രസംഗത്തിൽ ആവശ്യപ്പെട്ടു.
കഴിഞ്ഞ 47 വർഷമായി അമേരിക്കയ്ക്കെതിരെ ഇറാൻ നടത്തിവരുന്ന ഭീകരപ്രവർത്തനങ്ങളെ ട്രംപ് തന്റെ പ്രസംഗത്തിൽ എണ്ണിപ്പറഞ്ഞു. 1979-ലെ യുഎസ് എംബസി പിടിച്ചെടുക്കൽ, 1983-ലെ ബെയ്റൂട്ട് ബോംബാക്രമണം, ഇറാഖിലെ അമേരിക്കൻ സൈനികരുടെ കൊലപാതകം എന്നിവ അദ്ദേഹം ഓർമ്മിപ്പിച്ചു. ഒക്ടോബർ 7-ന് ഇസ്രായേലിൽ ഹമാസ് നടത്തിയ ആക്രമണത്തിന് പിന്നിലും ഇറാന്റെ പങ്കുണ്ടെന്നും ലോകത്തിലെ ഒന്നാം നമ്പർ ഭീകരവാദ സ്പോൺസറായ ഇറാനെ ഇനി സഹിക്കില്ലെന്നും ട്രംപ് കർശന നിലപാട് വ്യക്തമാക്കി.
ഇറാന്റെ ആണവ പദ്ധതികൾക്കെതിരെയുള്ള മുൻകരുതൽ നടപടികളും പ്രസിഡന്റ് വിശദീകരിച്ചു. ജൂണിൽ ‘ഓപ്പറേഷൻ മിഡ്നൈറ്റ് ഹാമർ’ വഴി ഇറാന്റെ പ്രധാന ആണവ കേന്ദ്രങ്ങൾ തകർത്ത കാര്യം അദ്ദേഹം പരാമർശിച്ചു. ഇറാൻ ഒരു ആണവായുധം നിർമ്മിക്കാൻ തന്റെ ഭരണകൂടം ഒരിക്കലും അനുവദിക്കില്ലെന്നും, അവരുടെ മിസൈൽ വ്യവസായത്തെയും നാവികസേനയെയും പൂർണ്ണമായും നശിപ്പിക്കുമെന്നും ട്രംപ് പ്രഖ്യാപിച്ചു. അമേരിക്കയുടെ സുരക്ഷയെ ഭീഷണിപ്പെടുത്തുന്ന ഈ ക്രൂരമായ ഏകാധിപത്യത്തെ തടയാൻ യുഎസ് സൈന്യം വൻതോതിലുള്ള സൈനിക നടപടി സ്വീകരിക്കുകയാണെന്നും അദ്ദേഹം പറഞ്ഞു.
പശ്ചിമേഷ്യയിലും ലോകമെമ്പാടും സമാധാനം പുനഃസ്ഥാപിക്കുന്നത് വരെ ഇറാനിലെ തന്ത്രപ്രധാനമായ കേന്ദ്രങ്ങളിൽ കനത്ത ബോംബാക്രമണം തുടരുമെന്ന് പ്രസിഡന്റ് വ്യക്തമാക്കി. ഈ ആഴ്ചയിലുടനീളം തടസ്സമില്ലാതെ സൈനിക നടപടികൾ ഉണ്ടാകുമെന്നാണ് സൂചന. യുദ്ധത്തിൽ അമേരിക്കൻ സൈനികർക്ക് ജീവൻ നഷ്ടപ്പെട്ടേക്കാമെങ്കിലും, ഇത് ഭാവി തലമുറയുടെ സുരക്ഷയ്ക്ക് വേണ്ടിയുള്ള ദൗത്യമാണെന്ന് അദ്ദേഹം പറഞ്ഞു. ഖമനേയിയുടെ മരണത്തിന് പിന്നാലെ ഇറാനിൽ വലിയ രീതിയിലുള്ള ഭരണപ്രതിസന്ധിയും പിൻഗാമിയെ ചൊല്ലിയുള്ള ആശങ്കകളും നിലനിൽക്കുന്നതായാണ് വിവരം.
