സ്തനാർബുദ ചികിത്സ രംഗത്ത് ശ്രദ്ധേയ മുന്നേറ്റമായി, അമേരിക്കൻ ഫുഡ് ആൻഡ് ഡ്രഗ് അഡ്മിനിസ്ട്രേഷൻ വെപ്ഡെജസ്ട്രന്റ് എന്ന പുതിയ മരുന്നിന് അംഗീകാരം നൽകി. ‘വെപ്പാനു’ (Vepanu) എന്ന ബ്രാൻഡ് നാമത്തിൽ വിപണിയിലെത്തുന്ന ഈ മരുന്ന്, ഈസ്ട്രജൻ റിസപ്റ്റർ-പോസിറ്റീവ്, HER2-നെഗറ്റീവ്, ESR1 മ്യൂട്ടേഷൻ ഉള്ള അഡ്വാൻസ്ഡ് അല്ലെങ്കിൽ മെറ്റാസ്റ്റാറ്റിക് സ്തനാർബുദ രോഗികൾക്കായാണ് ഉപയോഗിക്കുക.
Pfizerയും Arvinasയും ചേർന്നാണ് മരുന്ന് വികസിപ്പിച്ചത്. പ്രോട്ടിയോലൈസിസ് ടാർഗെറ്റിംഗ് ചിമേര സാങ്കേതികവിദ്യ ഉപയോഗിച്ച് വികസിപ്പിച്ച ആദ്യ എഫ്ഡിഎ-അംഗീകൃത മരുന്ന് എന്ന പ്രത്യേകതയും വെപ്ഡെജസ്ട്രന്റിനുണ്ട്.
എൻഡോക്രൈൻ ചികിത്സയ്ക്ക് ശേഷവും രോഗം പുരോഗമിച്ച രോഗികൾക്കാണ് ഈ ഓറൽ മരുന്ന് നിർദേശിക്കുന്നത്. ചികിത്സയ്ക്ക് അർഹരായ രോഗികളെ കണ്ടെത്തുന്നതിനായി ESR1 മ്യൂട്ടേഷൻ പരിശോധനയും നിർബന്ധമാണ്. ഇതിനായി Guardant360 CDx എന്ന പരിശോധനാ സംവിധാനത്തിനും എഫ്ഡിഎ അംഗീകാരം നൽകിയിട്ടുണ്ട്.
