ഫ്രാൻസ്, ഇറ്റലി, ബെൽജിയം എന്നിവിടങ്ങളിൽ പ്രതിഷേധങ്ങൾ നടക്കുന്ന പ്രദേശങ്ങൾ ഒഴിവാക്കണമെന്നും ജാഗ്രത പാലിക്കണമെന്നും ഇന്ത്യൻ പൗരന്മാർക്ക് വിദേശകാര്യ മന്ത്രാലയത്തിന്റെ നിർദേശം. പ്രാദേശിക അധികാരികൾ നൽകുന്ന സുരക്ഷാ നിർദേശങ്ങൾ കർശനമായി പാലിക്കണമെന്നും മന്ത്രാലയം അഭ്യർഥിച്ചു. ഈ രാജ്യങ്ങളിലെ ഇന്ത്യൻ നയതന്ത്ര ദൗത്യങ്ങൾ സ്ഥിതിഗതികൾ സൂക്ഷ്മമായി നിരീക്ഷിക്കുന്നുണ്ടെന്നും ഇന്ത്യൻ സമൂഹവുമായി നിരന്തരം ബന്ധപ്പെടുന്നുണ്ടെന്നും വിദേശകാര്യ മന്ത്രാലയ വക്താവ് രൺധീർ ജയ്‌സ്വാൾ അറിയിച്ചു.
ന്യൂഡൽഹിയിൽ നടന്ന ദ്വൈവാര മാധ്യമസമ്മേളനത്തിൽ സംസാരിക്കുകയായിരുന്നു അദ്ദേഹം. പ്രതിഷേധങ്ങൾ നടക്കുന്ന പ്രദേശങ്ങളിലേക്ക് പോകുന്നത് ഒഴിവാക്കണം. പുറത്തിറങ്ങുമ്പോൾ പ്രത്യേക ജാഗ്രത പുലർത്തണമെന്നും പ്രാദേശിക ഭരണകൂടങ്ങൾ നൽകുന്ന നിർദേശങ്ങൾ പാലിക്കണമെന്നും ജയ്‌സ്വാൾ വ്യക്തമാക്കി. ഫ്രാൻസിലെയും ഇറ്റലിയിലെയും ഇന്ത്യൻ എംബസികൾ ഇതിനകം പൗരന്മാർക്ക് സുരക്ഷാ ഉപദേശങ്ങൾ നൽകിയിട്ടുണ്ടെന്നും വിദേശത്തുള്ള ഇന്ത്യക്കാരുടെ സുരക്ഷയും ക്ഷേമവും ഉറപ്പാക്കാൻ സർക്കാർ പ്രതിജ്ഞാബദ്ധമാണെന്നും അദ്ദേഹം കൂട്ടിച്ചേർത്തു.
ജീവിതച്ചെലവ് വർധനവിനെച്ചൊല്ലിയുള്ള പ്രതിഷേധങ്ങൾ സംഘർഷങ്ങളിലേക്ക് നീങ്ങിയതിനെത്തുടർന്ന് ഫ്രാൻസിലെ ഇന്ത്യൻ എംബസി ബുധനാഴ്ച യാത്രാ-സുരക്ഷാ മുന്നറിയിപ്പ് പുറപ്പെടുവിച്ചിരുന്നു. ഫ്രാൻസിലുള്ള ഇന്ത്യക്കാരോടും രാജ്യത്തേക്ക് യാത്ര ചെയ്യാൻ ഉദ്ദേശിക്കുന്നവരോടും ജാഗ്രത പാലിക്കാനായിരുന്നു നിർദേശം.
സ്കൂളുകളിലെ മോശം സാഹചര്യങ്ങളും അധ്യാപകരുടെ കുറവും ഉൾപ്പെടെയുള്ള വിഷയങ്ങളെച്ചൊല്ലി സെപ്റ്റംബർ അവസാനത്തോടെയാണ് ഫ്രാൻസിൽ പ്രതിഷേധങ്ങൾ ആരംഭിച്ചതെന്നാണ് റിപ്പോർട്ടുകൾ. പിന്നീട് ജീവിതച്ചെലവിലെ വർധന, ഇന്ധനവിലക്കയറ്റം, പൊതുമേഖലയിലെ ബജറ്റ് വെട്ടിക്കുറയ്ക്കൽ, പ്രസിഡന്റ് ഇമ്മാനുവൽ മാക്രോണിന്റെ ഭരണത്തിനെതിരായ വിമർശനങ്ങൾ എന്നിവയും പ്രതിഷേധങ്ങൾക്ക് ആക്കം കൂട്ടി. ഇതോടെ പ്രക്ഷോഭം രാജ്യത്തിന്റെ വിവിധ ഭാഗങ്ങളിലേക്ക് വ്യാപിച്ചു.
പ്രതിഷേധങ്ങൾ നടക്കുന്ന വലിയ ഒത്തുചേരലുകളും തിരക്കേറിയ പ്രദേശങ്ങളും ഒഴിവാക്കണമെന്നും പ്രാദേശിക അധികാരികളുടെ നിർദേശങ്ങൾ പാലിക്കണമെന്നും ഫ്രാൻസിലെ ഇന്ത്യൻ എംബസി എക്സിലൂടെ പുറത്തിറക്കിയ അറിയിപ്പിൽ വ്യക്തമാക്കി. സമീപകാല സംഭവവികാസങ്ങളും ചില പ്രദേശങ്ങളിൽ ഏർപ്പെടുത്തിയ കർഫ്യൂകളും കണക്കിലെടുത്ത് ഇന്ത്യക്കാർ ജാഗ്രത തുടരണമെന്നും എംബസി അഭ്യർഥിച്ചു.
