തിരുവനന്തപുരം കോർപ്പറേഷൻ കൗൺസിലർ സ്ഥാനത്തുനിന്നുള്ള രാജി സംബന്ധിച്ച വിശദീകരണത്തിൽ ബിജെപി നേതൃത്വത്തിനെതിരെ പരോക്ഷ വിമർശനവുമായി ആർ. ശ്രീലേഖ. ഡിജിപിയുടെ ജോലി ചെയ്യുന്ന ഒരാളോട് കോൺസ്റ്റബിളിന്റെ ജോലി ചെയ്യാൻ ആവശ്യപ്പെട്ടാൽ ബുദ്ധിമുട്ടുണ്ടാകുമെന്ന പരാമർശത്തിലൂടെയാണ് ശ്രീലേഖ തന്റെ അതൃപ്തി പ്രകടിപ്പിച്ചത്. താൻ എന്തു ചെയ്താലും ചിലർ വിമർശന പോസ്റ്റുകൾ എഴുതുകയാണെന്നും വിഷമം തോന്നിയപ്പോഴാണ് മേയർക്ക് രാജി സന്ദേശം അയച്ചതെന്നും അവർ വ്യക്തമാക്കി.
അതേസമയം, ബിജെപി വിടില്ലെന്ന് ആവർത്തിച്ച ശ്രീലേഖ, പാർട്ടിയുടെ അഭിമാനമുള്ള അംഗമായി ജീവിതാവസാനം വരെ തുടരുമെന്നും പറഞ്ഞു. ‘ഞാനൊരു മോദി ഭക്തയാണ്. മോദിജി എന്നു പറഞ്ഞാൽ എനിക്കിപ്പോഴും ആരാധനാമൂർത്തിയാണ്. അതുകൊണ്ട് ഒരിക്കലും പാർട്ടി വിട്ടുപോകില്ല’, ശ്രീലേഖ വ്യക്തമാക്കി.
‘ബിജെപിയുടെ അച്ചടക്കമുള്ള പ്രവർത്തകയായി ജീവിതാവസാനം വരെ തുടരും, ഉറപ്പ്’ എന്ന തലക്കെട്ടിലാണ് ശ്രീലേഖ വിശദീകരണ വീഡിയോ പങ്കുവെച്ചത്.
‘മേയറാകാത്തതല്ല രാജിക്ക് കാരണം’
തിരുവനന്തപുരം കോർപ്പറേഷനിൽ ബിജെപി അധികാരത്തിലെത്തിയപ്പോൾ ഏറെ സന്തോഷിച്ചിരുന്ന തന്നെ മേയറാക്കാത്തതാണ് കൗൺസിലർ സ്ഥാനം രാജിവയ്ക്കാൻ കാരണമെന്ന പ്രചാരണത്തിൽ കാര്യമില്ലെന്നും ശ്രീലേഖ പറഞ്ഞു. കൗൺസിലർ എന്ന നിലയിൽ നേരിടുന്ന സമ്മർദങ്ങളും പരിമിതികളുമാണ് രാജി തീരുമാനത്തിലേക്ക് നയിച്ചതെന്നാണ് അവരുടെ വിശദീകരണം.
‘ഡിജിപിയോട് പൊലീസ് കോൺസ്റ്റബിളിന്റെ ജോലി ചെയ്യാൻ പറഞ്ഞാൽ ബുദ്ധിമുട്ടുണ്ടാകും. ആർമി ജനറലിനോട് പട്ടാളക്കാരനായി പോയി അതിർത്തി കാക്കാൻ പറഞ്ഞാലും ആ ജോലി ചെയ്യാൻ പ്രയാസമായിരിക്കും. ആ പ്രയാസങ്ങളെല്ലാം സഹിച്ചാണ് മത്സരിച്ചതും ജോലി ചെയ്തുകൊണ്ടിരിക്കുന്നതും’, ശ്രീലേഖ പറഞ്ഞു.
പൊലീസ് ഉദ്യോഗസ്ഥയായിരുന്ന കാലത്ത് നേരിട്ട സമ്മർദങ്ങളെക്കുറിച്ച് നേരത്തേ തുറന്നുപറഞ്ഞിട്ടുണ്ടെന്നും അന്ന് രാജിവയ്ക്കാതെ അതിജീവിക്കാൻ സാധിച്ചത് പൊലീസിനുള്ളിലെ ശക്തമായ പിന്തുണാ സംവിധാനം കാരണമായിരുന്നുവെന്നും അവർ കൂട്ടിച്ചേർത്തു. താൻ വിളിച്ചുപറയുന്ന കാര്യങ്ങൾ കേൾക്കാൻ അന്ന് ആളുകളുണ്ടായിരുന്നുവെന്നും ശ്രീലേഖ പറഞ്ഞു.
‘കൗൺസിലർ എന്ന നിലയിൽ ആരും കേൾക്കുന്നില്ല’
ജോലി, അഡ്മിഷൻ തുടങ്ങിയ ആവശ്യങ്ങളുമായും അതിർത്തിത്തർക്കങ്ങൾ ഉൾപ്പെടെയുള്ള വിഷയങ്ങളുമായും നിരവധി പേർ രാത്രിവരെ വീട്ടിലും ഓഫീസിലും എത്തുന്നുണ്ടെന്ന് ശ്രീലേഖ പറഞ്ഞു. ഉപദേശം നൽകുകയോ നിർദേശങ്ങൾ മുന്നോട്ടുവയ്ക്കുകയോ ചെയ്താലും പലരും തൃപ്തരാകുന്നില്ലെന്നും അവർ ചൂണ്ടിക്കാട്ടി.
‘ഒരു പൊലീസ് സ്റ്റേഷനിൽ വിളിച്ചുപറഞ്ഞാൽ പോലും കേൾക്കില്ല. കോൺഗ്രസ് ഭരിക്കുന്ന കേരളത്തിൽ ബിജെപി കൗൺസിലർ എന്ന നിലയിൽ ആരും എന്നെ കേൾക്കുന്നില്ല. ഭയങ്കര സമ്മർദത്തിലൂടെയാണ് കടന്നുപോകുന്നത്. ഒരു പരിധി കഴിഞ്ഞപ്പോൾ എന്നെക്കൊണ്ട് ഇതൊന്നും പറ്റുന്നില്ലെന്ന് തോന്നി’, ശ്രീലേഖ വിശദീകരിച്ചു.
ടെലിഫോൺ കണക്ഷൻ ഇല്ലാതാകുക, വൈദ്യുതി തടസ്സപ്പെടുക, മാലിന്യം കുന്നുകൂടുക, ഓടകൾ വൃത്തിഹീനമാകുക തുടങ്ങിയ പ്രശ്നങ്ങൾ ഉടൻ പരിഹരിച്ചുനൽകണമെന്നാണ് ജനങ്ങൾ പ്രതീക്ഷിക്കുന്നതെന്നും അവർ പറഞ്ഞു. ഇത്തരം ആവശ്യങ്ങൾ നിരന്തരം കൈകാര്യം ചെയ്യേണ്ടിവരുന്നത് വലിയ സമ്മർദമുണ്ടാക്കുന്നുവെന്നും ശ്രീലേഖ വ്യക്തമാക്കി.
ആരോഗ്യ പ്രശ്നങ്ങളും തിരക്കുകളും
സെപ്റ്റംബർ 30നാണ് രാജി സന്ദേശം കൈമാറിയതെന്ന് ശ്രീലേഖ പറഞ്ഞു. ഇതിനിടെ കടുത്ത ആരോഗ്യപ്രശ്നങ്ങൾ നേരിട്ടതായും കഴിഞ്ഞ ഒമ്പത് മാസമായി തുടർച്ചയായ തിരക്കുകൾ കാരണം തന്റെ ജീവിതക്രമം ആകെ താറുമാറായതായും അവർ വിശദീകരിച്ചു.
പാർട്ടി നേതൃത്വം ആവശ്യപ്പെട്ടതിനെ തുടർന്നാണ് കൗൺസിലർ സ്ഥാനത്ത് തുടരാൻ തീരുമാനിച്ചതെന്നും ശ്രീലേഖ കൂട്ടിച്ചേർത്തു.
രാജി സംബന്ധിച്ച വിശദീകരണത്തിലൂടെ ബിജെപിയിൽ തുടരുമെന്ന നിലപാട് വ്യക്തമാക്കിയ ശ്രീലേഖ, കൗൺസിലർ എന്ന നിലയിൽ നേരിടുന്ന സമ്മർദങ്ങളും പാർട്ടിക്കുള്ളിലെ വിമർശനങ്ങളും പരോക്ഷമായി തുറന്നുപറഞ്ഞിരിക്കുകയാണ്.
