തിരുവനന്തപുരം വിഴിഞ്ഞത്ത് മത്സ്യത്തൊഴിലാളികൾക്കായി പുതിയ ഫിഷിംഗ് ഹാർബർ നിർമിക്കാൻ സംസ്ഥാന സർക്കാർ ഉത്തരവിട്ടു. അദാനി വിഴിഞ്ഞം പോർട്ട് പ്രൈവറ്റ് ലിമിറ്റഡ് വഴിയാണ് പദ്ധതി നടപ്പാക്കുന്നത്. മത്സ്യത്തൊഴിലാളികളുടെ കാലങ്ങളായുള്ള ആവശ്യത്തിനും പ്രശ്നങ്ങൾക്കും പരിഹാരമായാണ് ഈ പുതിയ പദ്ധതി പ്രഖ്യാപിച്ചിരിക്കുന്നത്.
പദ്ധതിയുടെ പ്രത്യേകതകൾ:
- പുലിമുട്ടും ബെർത്തും: 235 മീറ്റർ നീളത്തിൽ പുതിയ പുലിമുട്ടും, 500 മീറ്റർ നീളത്തിലുള്ള ‘L’ ആകൃതിയിലുള്ള ഫിഷറി ബെർത്തും പദ്ധതിയിൽ ഉൾപ്പെടുന്നു.
- അനുബന്ധ സൗകര്യങ്ങൾ: ഡ്രഡ്ജിംഗ്, ലൈറ്റിംഗ്, റോഡ് കണക്റ്റിവിറ്റി തുടങ്ങിയ സജ്ജീകരണങ്ങളും ഇതിന്റെ ഭാഗമായി ഒരുക്കും. മത്സ്യത്തൊഴിലാളികൾക്ക് സുരക്ഷിതമായി ബോട്ടുകൾ അടുപ്പിക്കാനും മീൻ കയറ്റി ഇറക്കാനും ഇത് ഏറെ സഹായകരമാകും.
- ആധുനിക സംവിധാനങ്ങൾ: പിടിച്ചുകൊണ്ടുവരുന്ന മത്സ്യം എളുപ്പത്തിൽ കരയ്‌‌ക്കെത്തിക്കാനും മറ്റ് വാഹനങ്ങളിലേക്ക് മാറ്റാനുമുള്ള ആധുനിക സൗകര്യങ്ങളും ഇവിടെ ഒരുക്കുമെന്ന് സർക്കാർ അറിയിച്ചിട്ടുണ്ട്.
CWPRS പഠനവും CRZ അനുമതിയും:
സെൻട്രൽ വാട്ടർ ആൻഡ് പവർ റിസർച്ച് സ്റ്റേഷന്റെ (CWPRS) പഠനത്തിന്റെ അടിസ്ഥാനത്തിലാണ് പുതിയ ഹാർബർ നിർമിക്കാൻ തീരുമാനമെടുത്തത്. വിഴിഞ്ഞം തുറമുഖത്തിന്റെ പാരിസ്ഥിതിക, തീരദേശ നിയന്ത്രണ മേഖല (CRZ) അനുമതികളുമായി ബന്ധപ്പെട്ട നിർദ്ദേശങ്ങളുടെ ഭാഗമായാണ് അധികമായി ഒരു ഫിഷിങ് ലാൻഡിങ് സെന്റർ കൂടി സ്ഥാപിക്കാൻ തീരുമാനമായത്.
പദ്ധതി യാഥാർത്ഥ്യമാകുന്നതോടെ പ്രദേശത്തെ മത്സ്യത്തൊഴിലാളികളുടെ യാത്രാ, തൊഴിൽപരമായ ബുദ്ധിമുട്ടുകൾക്ക് വലിയൊരു പരിഹാരമാകും എന്നാണ് വിലയിരുത്തപ്പെടുന്നത്.
